Hvalir Skjálfanda
Frá upphafi hvalaskoðunarferða hefur hrefnan verið algengasti hvalurinn í Skjálfandaflóa. Með árunum hefur þó hnúfubakurinn orðið tíður gestur í flóanum en auk þess eru hnísur og höfrungar algeng sjón. Segja má að mestar líkur séu að sjá einhverja þessara fjögurra tegunda í hvalaskoðunarferð.
Síðustu ár, einkum fyrri hluta sumars, hefur steypireyðurin, stærsta dýr veraldar, einnig vanið komur sínar í flóann en fágætari tegundir á borð við langreyði, háhyrning, andarnefju og sandreyði flækjast í flóann við og við.
Hér að neðan má sjá lista yfir alla hvali sem sést hafa í Skjálfanda og skemmtilegar upplýsingar um þá.
Hrefna
Hrefnan er minnst skíðishvala en er samt sem áður engin smásmíði. Hún getur orðið allt að tíu metrar að lengd og vegið tíu tonn.
Hnýðingur
Hnýðingur er sú tegund höfrunga sem oftast sést í hvalaskoðunarferðum. Talið er að stofninn við Ísland sé um 10–12.000 dýr.
Hnúfubakur
Hnúfubakar koma upp að ströndum Íslands á vorin eins og flest stórhvelin. Þeir koma sunnan úr höfum frá vetrarstöðvunum, sem eru t.d. í Mexíkóflóa.
Hnísa
Hnísan er minnsta hvalategundin hér við land en afar algeng. Stofninn er líklega um 25–27.000 dýr. Hnísur fara oft saman í hópum þó svo að stundum megi rekast á stök dýr.
Steypireyður
Steypireyðurin er stærsta dýr sem nokkru sinni hefur lifað á jörðinni. Lengsta steypireyður sem mæld hefur verið var 33 ½ metri og sú þyngsta var nærri 200 tonn.
Andarnefja
Andarnefjan er álíka stór og hrefna en mjög ólík henni. Andarnefjan, sem er brúnleit á lit, er fremur sjaldséð inni á fjörðum og flóum en heldur sig frekar þar sem djúpt er og mun engin hvalategund kafa dýpra en andarnefjan nema búrhvalurinn.
Langreyður
Langreyður er skíðishvalur eins og steypireyður og tegundirnar eru náskyldar. Langreyðar koma hingað á vorin og dvelja fram á haust.
Sandreyður
Sandreyðurin er skíðishvalur eins og steypireyður og langreyður. Sandreyðar koma upp að ströndum Íslands á vorin eins og flest önnur stórhveli eftir vetrardvöl í Suðurhöfum.
Grindhvalur
Grindhvalurinn er af ætt höfrunga og algengur við Ísland. Talið er að stofninn, sem heldur sig á íslensku hafsvæði, sé um 35.000 dýr.
Háhyrningur
Háhyrningurinn er líklega einhver þekktasta hvalategund veraldar, ekki síst vegna þeirrar athygli sem fangaðir háhyrningar hafa hlotið í sædýrasöfnum um allan heim.
Búrhvalur
Búrhvalurinn er stærstur tannhvala. Hann kemur upp að ströndum Íslands á vorin eftir vetrardvöl í Suðurhöfum. Búrhvalir halda sig mest á djúpslóð þar sem skilyrði til fæðuöflunar eru best.
Leit
Mynd
Fįnar
