Lundi (Fratercula arctica)

Lengd: 32 cm

Þyngd: 364-605 g

Vænghaf: 47-65 cm

Stofnstærð: 3.000.000 pör

Lundinn er algengur um allt land enda lundastofninn stærsti fuglastofn landsins. Hann verpir í byggðum við ströndina og í eyjum. Algengast er að lundinn grafi sér holur til að verpa í en einnig fer hann inn í sprungur í bergi og í urðir. Dæmigerður lundavarpstaður er því iðjagræn og sundurgrafin grasbrekka. Utan varptíma heldur lundinn sig úti á reginhafi. Lundinn lifir á smáfiski, fyrst og fremst sandsíli og loðnu. Lundinn hefur verið mikið nýttur til átu og er hann þá veiddur í háf.

Lundinn verpir á öllum eyjum á og við Skjálfandaflóa en einnig yst á Tjörnesi. Heildarfjöldi para á svæðinu er rúmlega 100.000 pör. Hann er því mjög algengur og auðséður á sjó.