Fréttir Norðursiglingar

Það er sönn ánægja að segja frá því að fyrsta ferðin á Scoresbysundi, Grænlandi, heppnaðist með eindæmum vel. Bæði farþegar og áhöfn voru stórhrifin af öllu því sem þessi heimsins stærsti fjörður hafði upp á að bjóða, hvað varðar villta náttúru og stórfenglegt landslag. Ute Zimmer var einn fargþega um borð í skútunni Hildi þessa fyrstu viku. Hún orðaði upplifun sína fallega:
"Þakka ykkur öllum innilega fyrir þessa einstöku ferð, þetta ótrúlega ævingtýri, heila viku af nýjum upplifunum og heimsókn á magnaða listasýningu undir berum himni í Scoresbysundi. Við skemmtum okkur frábærlega með "Hildi" og áhöfninni. Eitthvað sem aldrei gleymist..."
 
Reynslumikil áhöfnin og hin glæsilega skúta Hildur, hafa án efa gert þessa upplifun ennþá minnistæðari. Ferðlangarnir fóru í skoðunarferðir á landi og virtu fyrir sér náttúru- og dýralíf Grænlands; framreiddar voru dýrindis máltíðir; siglt var innan um ísjaka og háa fjalltinda og síðast en ekki síst naut hópurinn félagsskapar hvers annars.

Seinni hópurinn er nú að verða hálfnaður með sína vikudvöl og síðustu fréttir frá skipstjóranum herma að hópurinn hafi nú rétt í þessu siglt út úr Ankor Vík og næst á dagskrá sé að varpa ankeri í Hekluhöfn. Þónokkur ís hefur verið á svæðinu sem gerir það að verkum að fara þarf um svæðið af mikilli varkárni. En andrúmsloftið um borð er gott og hópurinn nýtur upplifuninnar!

Eftirfarandi eru myndir sem teknar voru 20. - 27. ágúst, í fyrri vikunni í Grænlandsferðinni 2011.










































Hildur H.