Fréttir Norðursiglingar

Síðustu vikur hafa 4 Íslendingar á vegum Norðursiglingar starfað við slippinn í Egernsund í Danmörku þar sem breyta á nýjasta bát fyrirtækisins, Hildi í skonnortu.

Hildur um miðjan nóvember

Íslendingarnir hafa nú unnið við niðurrif á öllu því sem ekki verður notað s.s. gömlu og ryðguðu stýrishúsi sem vegur um 7 tonn en einnig V8 Caterpillar vél.

Stýrishús og vél á ferðinni

Stýrishúsið þjónar nú sem "skrifstofa" og gámurinn er "verkstæði"

Okkar menn eru vanir með kúbeinið og gengur niðurrifið vel en þeir munu einnig taka þátt í uppbyggingunni s.s. niðursetningu nýrrar Scaniu sem og hönnun og uppsetningu á nýju rafkerfi.

Það er hins vegar Christian Jonsson skipasmiður og hans menn sem bera ábyrgð þegar kemur að smíði reiðans og þeir munu einnig skipta um ónýtar styttur, borðstokka og planka. Á verkstæðinu þeirra í slippnum eru möstrin 2 að taka á sig mynd og eru glæsileg á að líta. Þau munu rísa um 20 metra yfir sjávarmál og hafa styrk til að bera u.þ.b. 225 fermetra segldúk í samtals 7 seglum.

Möstrin í smíðum. Hér sjást um 2/3 af möstrunum sem verða um 18 og 20 metrar á hæð.

Slippurinn hans Christian er mekka tréskipa og starfsmennirnir þar búa yfir mikilli reynslu. Það spillir heldur ekki fyrir að eigendur og áhafnir Dagmar Aaen, Bodil og Carmelan sem eru skútur af svipaðri stærð og Hildur, eru okkar mönnum innan handar í einu öllu.
Þó að veðrið hafi verið fremur leiðinlegt síðustu vikur þar sem rigningin hefur verið í aðalhlutverki eru menn bjartsýnir á framhaldið og með góðra vina hjálp virðist sem allt sé mögulegt.

Heimir