Fréttir Norðursiglingar

Norðursigling hefur verið tilnefnd til Umhverfisverðlauna Ferðamálastofu 2009.

Tilgangur verðlaunanna er að beina athyglinni að þeim ferðamannastöðum eða fyrirtækjum í ferðaþjónustu sem sinna umhverfismálum í starfi sínu og framtíðarskipulagi. Þau geti með því orðið hvatning til ferðaþjónustuaðila og viðskiptavina þeirra að huga betur að umhverfi og náttúru og styrkja þannig framtíð greinarinnar. Verðlaunin hafa verið afhent árlega frá árinu 1995 og er þetta því í 15. skiptið.

Þessi tilnefning er aðstandendum Norðursiglingar mikil hvatning í því að setja áfram umhverfismál í forgang í hverjum þeim verkefnum sem fyrirtækið vinnur að.

Þess má geta að Knörrinn, fyrsti bátur Norðursiglingar, hlaut umhverfisverðlaun Ferðamálaráðs Íslands árið 1996.

Það kemur svo í ljós 20. nóvember næstkomandi hver þeirra 27 aðila sem tilnefndir voru hljóta verðlaunin í ár.

ÞH