Fréttir Norðursiglingar

Föstudaginn 16. nóvember fór starfsfólk Norðursiglingar í óvissuferð og að þessu sinni varð Mývatnssveitin fyrir valinu. Það var fjörugur hópur sem hittist að morgni á kaffistofunni og fyrir utan beið forlátur fjallabíll frá Rúnari Óskarssyni. Fyrsti við komustaður var Nautadalur sem liggur út frá Námaskarði í átt til Kröflu. Þar hefur átt sér stað mikil uppgræðsla lands og tekist hefur að stöðva mikinn sandblástur sem ógnaði m.a. hraunhellum og grónu landi lengra inni í dalnum.

Því næst lá leiðin upp að Víti við Kröflu og nýjustu borholu svæðisins, holu númer 40. Eftir hádegismat í mötuneyti Kröfluvirkjunar var haldið í Jarðböðin en þar sem sunnanvindurinn blés heldur hressilega var ákveðið að fara heldur í Grjótagjá. Gjáin hefur notið vaxandi vinsælda síðustu ár eftir að hitastig hennar fór að færast heldur nær 40 gráðunum en var áður hátt í 50. Eftir baðið var keyrt upp á Lúdent sem er sprengigígur og varð til í þeytigosi og að gígaröðinni Lúdentsborgum.

Um kvöldið var snæddur kvöldverður á Sel-Hótel Mývatn eftir velheppnaða skoðunar- og skemmtiferð um sveitina.
Meðfylgjandi eru nokkrar myndir teknar í ferðinni.

ÞH

Hraunhellir við Nautadal

Staldrað við við Víti

Inni í vélasal í Kröfluvirkjun

Hlýtt og notalegt í Grjótagjá 

Við Lúdentsborgir

Ævintýraleg kvöldbirta við Mývatn

Allur hópurinn uppi á Lúdent