Fréttir Norðursiglingar

Norðursigling og Hvalasafnið á Húsavík harma og gagnrýna harðlega þá ákvörðun sjávarútvegsráðherra að leyfa stórfelldar hvalveiðar eða samtals allt að 1.000 hrefnum og 750 langreyðum á næstu 5 árum.

Ákvörðun Einars K. Guðfinnssonar getur haft alvarlegar afleiðingar í för með sér, m.a. slæm áhrif á nú þegar skerta ímynd Íslands en ekki síður munu stórfelldar veiðar á hrefnu fara illa með möguleika til
hrefnuskoðunar þar sem gæfustu dýrin verða veidd fyrst af öllum.
 
Undirritaðir aðilar vona að þessi ákvörðun sem ber vott um örvæntingu og lýsir vanvirðingu gagnvart ferðaþjónustunni verði ekki til þess að skaða hagsmuni þeirra sem  standa fyrir náttúrutengdri ferðaþjónustu á Húsavík og annars staðar á Íslandi.

Norðursigling og Hvalasafnið munu eftir sem áður leggja allt kapp á vistvæna ferðaþjónustu af hæsta gæðaflokki og munu áfram berjast gegn ónauðsynlegum hvalveiðum Íslendinga.