Fréttir Norðursiglingar

Sá orðrómur hefur hvissast út að ríkistjórnin hyggist leyfa dráp á 39 hrefnum á næstunni. Eftir háðulega útreið á ráðstefnu Alþjóðahvalveiðiráðsins ætla Íslendingar að fórna orðstí sínum fyrir 39 hrefnur sem skipta engu máli fyrir afkomu eða efnahag þjóðarinnar lífs eða liðnar. Þetta eru hörmulegar fréttir fyrir þá sem eru að markaðsetja íslenskar vörur og íslenska ferðaþjónustu á erlendri grund. Hvar er skynsemin í þessari ákvörðun? Er það ekki hroki frá helvíti að fara í hrefnudráp í trássi við alþjóðasamfélagið? Hvalveiðar hafa aldrei verið sá útvegur sem hvalaskoðun er orðin í dag. Fyrir okkur sem erum að selja íslandsferðir í útlöndum er hvalaskoðunin orðin jafn mikilvægur hluti af íslenskri náttúruupplifun eins og okkar verðmætustu náttúruperlur. Hvar er trúverðugleiki okkar þegar við erum að sýna hvalina sem undur veraldar í öðrum firðinum og stunda síðan tilgangslaust dráp á sömu dýrunum í þeim næsta? Ef að þessi orðrómur er réttur þá erum við að taka stórt skref afturábak fyrir atvinnuveg gærdagsins sem hvalveiðar vissulega eru.



Hrefna við síðu Náttfara


Hrefna veltir sér við Knörrinn