Fréttir Norðursiglingar

Sá staður og sú stund sem valin eru til árshátíðahalds Norður-Siglingar hafa jafnan verið óhefðbundin. Eðli málsins samkvæmt vinna flestir hjá fyrirtækinu yfir sumartíman og því væri það bragðdaufari stíll en ella að halda slíkan mannfögnuð að vetri þegar einungis um 5-6 manns eru við störf. Í þetta sinn varð Rauðavík norðan Vargsness undir Kinnarfjöllum fyrir valinu. Um borð í Knerrinum voru svo hátt í 30 manns þegar hann lagðist við stjóra á lygnri víkinni að kveldi 15. ágúst og voru þeir ferjaðir í land á gúmmítuðru. Þar var dvöldu menn svo í góðu yfirlæti við söng, át og skemmtiatriði fram eftir kvöldi. Veður var líkt og vænta má við Skjálfanda á ágústkveldi hlýtt og gott, eða 20 stiga hiti og logn. Spennandi verður að sjá hvaða eyðivík verður næst fyrir valinu en þær eru nokkrar ókannaðar enn á þessu ævintýralega svæði.



Árshátíðargestir prúðbúnir í fjörunni


Veisluborðið svignaði nú ekki beint undan kræsingunum en það kom til af gríðarlegum styrk borðsins.


Viggi og Hulda voru í skemmtinefnd og stóðu sig með ágætum