Fréttir Norðursiglingar

Í spegilsléttum sjó "réru" starfsmenn skrifstofu Húsavíkurbæjar til fiskjar síðastliðinn laugardag á Bjössa Sör. Eitthvað hafði bæjarstjóri misskilið veiðitúrinn og taldi sig vera að veiðum í ábataskyni og gagnrýndi skipstjóra fyrir val á fiskimiðum og rýran afla. Heimir skipstjóri útskýrði fyrir mannskapnum að um vísindaveiðar væri að ræða og eingöngu væri leyfi fyrir 38 þorskum og þar af þyrfti megnið af þeim að vera þorskaseiði eða í mesta lagi pervisnir þaratittir. Einhverjir stórir enduðu þó um borð en á móti kom að ein sjóstöngin endaði á botninum austur af Lundeyjarbreka. Menn skemmtu sér ágætlega á vísindaveiðunum enda kostur sá er dreginn var upp úr sjópokum veiðimannanna með ágætum. HH



Starfsmenn bæjarskrifstofunnar við vísindaveiðar úti við Lundey.