Fréttir Norðursiglingar

Nú í morgunsárið, reyndar svo snemma að morgunhanarnir á www.skarpur.is höfðu ekki galað, sigldi Rainbow Warrior, flaggskip Greenpeace samtakanna inn flóann. Þeir grænu koma með friði til að kynna sín sjónarmið fyrir Íslendingum og tók Norður-Sigling á móti þessum erlendu gestum með því að sigla á móti þeim á þremur af fjórum bátum fyrirtækisins. Haukur og Rainbow warrior eiga það sameiginlegt að vera seglskip og var gaman að sjá þessi samt mjög ólíku skip sigla saman inn flóann, annað fyrrverandi íslenskur vertíðarbátur og hitt fyrrum síðutogari, smíðaður í Bretlandi 1957. Grænfriðungar hafa tekið upp breytt vinnubrögð og ráðast nú ekki beint gegn hvalveiðibátunum heldur beita röksemdafærslu og kynna sín sjónarmið á friðsamlegan hátt. Þeir hafa sem kunnugt er komið með tilboð til Íslendinga og er það m.a. "að Íslendingar fái að nota heimasíðu Greenpeace og aðrar boðleiðir til að biðja 2,8 milljónir stuðningsmanna þeirra að taka þátt í að vernda viðkvæma náttúru Íslands." Hverjar sem skoðanir manna kunna að vera hvet ég fólk til að kynna sér málstað Grænfriðunga og heimsækja skipið. Undirritaður getur staðfest að hann fékk hvorki grænar bólur né varð hann grænn af öfund við að koma um borð og virtust flestir þeirra 30 grænjaxla sem voru um borð vera hið ágætasta fólk. HH



Haukur, Náttfari og Rainbow Warrior sigla inn Skjálfanda. (mynd: HH)


Seglskipin Haukur og Rainbow Warrior hlið við hlið. (mynd: HH)


"Stríðsmaður regnbogans" við kaja á Húsavík. (mynd: HH)