Fréttir Norðursiglingar

Þórunn Harðardóttir, hvalaleiðsögukona, vélstýra og skipstýra hjá Norður-Siglingu flaug á haustdögum vestur um haf til að kynna sér siglingamenninguna á austurströndinni og með það fyrir augum að taka þátt í siglingakeppni nokkurri þar sem skonnortur einar skipa taka þátt.

Þórunn segir lítið mál hafa verið fyrir sig að fá skipspláss og á endanum kaus hún að sigla á 120 feta skonnortu, Liberty Clipper frá Boston. Í keppninni sem haldin hefur verið síðan 1972 er siglt frá Baltimore til Norfolk eða alls 127 sjómílur. Þórunn segir uppákomur ýmsar og allt það félagslíf sem myndast á hafnarsvæðinu í kringum keppnina nánast stela senunni af keppninni sjálfri og að mikið sé um dýrðir.

Heimsóknin óvænta frá Húsavík vakti að vonum mikla athygli og voru Þórunni veitt einskonar verðlaun eða viðurkenning að keppni lokinni. Ennfremur var einu skonnortu Íslendinga boðinn innganga í félag það er stendur að keppninni eða American Schooner Association og hefur þar með Íslandsdeild félagsins verið opnuð.

HH



Þórunn með forsprakka keppninnar, Lane Briggs, jaxli sem skolar morgunteinu niður með alvöru sjóararommi.


Nokkrar af skonnortunum í keppninni sem kallast Chesapeak Schooner Race.


Beðið eftir beggja skauta byr um borð í Liberty Clipper en Þórunn og félagar hrepptu hið versta logn í keppninni sem lék þau ansi grátt.