Fréttir Norðursiglingar

Vegna umræðu í fjölmiðlum síðustu daga um hvalaskoðunarfyrirtækin vilja eigendur Norður-Siglingar ehf. á Húsavík láta eftirfarandi koma fram.

Félagið hóf rekstur fyrir aðeins tæplega níu árum og hefur á þeim tíma flutt 132.000 farþega í hvalaskoðun á Skjálfandaflóa.

Frá upphafi hefur einn megin tilgangur Norður-Siglingar verið varðveisla íslenskra eikarskipa sem voru þá og hafa enn frekar síðan týnt tölunni þar sem smíði eikarskipa var hætt á Íslandi á áttunda áratug síðustu aldar.

Eigendur Norður-Siglingar einsettu sér að gera hugtakið “íslensk strandmenning” að útflutningsvöru. Þess má m.a. sjá stað í því að nú er skonnortan Haukur orðin að veruleika. Haukur er “lifandi” eftirlíking af íslenskri fiskiskútu frá síðustu áratugum nítjándu aldar. Auk Hauks rekur félagið Knörrinn, Náttfara og Bjössa Sör. Allir eru þeir glæsilegir íslenskir eikarbátar og stórmerkur hluti strandmenningararfs Íslendinga.

Í strandmenningarsetrinu í Gamla Bauk vinnur félagið að uppsetningu sýninga sem er að sama skapi ætlað að varðveita þekkingu á hugtökum og myndefni frá skútuöldinni íslensku.

Félagið hefur því frá upphafi lagt á það áherslu að tengja saman framansagða menningararfleifð og þá afþreyingu sem fólgin er í hvalaskoðunarferðum.

Í fréttum fjölmiðla hefur því verið slegið fram að afkoma og eiginfjárstaða hvalaskoðunarfyrirtækjanna sé bágborin.

Þetta á ekki við um Norður-Siglingu ehf. á Húsavík.

Undanfarin ár hefur félagið verið rekið með hagnaði og eiginfjárstaða félagsins er traust.

F.h. Norður-Siglingar
Hörður Sigurbjarnarson



Bátar Norður-Siglingar koma að landi með rúmlega 200 farþega sumarið 2003. F.v. Náttfari, Bjössi Sör, Knörrinn & Haukur.
Mynd, Hafþór Hreiðarsson