Fréttir Norðursiglingar

Í litlum skúr á Borgarhóli, stað þeim er Garðar Svavarsson reisti fyrsta hús Íslandssögunnar um 870 er kjörviðarskáld Húsvíkinga við vinnu sína. Ólafur Guðmundsson hefur skorið ýmislegt út í rekavið fyrir Norður-Siglingu á undanförnum árum og ekki sér fyrir endann á því.

Þegar Skipasmíðastöðin var reist við Gamla Bauk og ákveðið var að hún skyldi hýsa muni tengda sjósókn og strandmenningu Húsvíkinga fyrr og síðar var fljótlega haft samband við hagleiksmanninn Ólaf Guðmundsson. Meðal muna sem hann hefur þegar skorið og málað er kappi einn mikill ofan aðaldyranna með 16 húsvískum eikarbátum. Sjávarguðinn Njörður stendur stoltur um 5 metra hár í einu skoti hússins, meistaralega tálgaður af Ólafi. Útskorna sögu Garðars og Náttfara má finna á tveimur rekaviðarfjölum yfir gluggum austurstafnsins og nú þessa dagana vinnur hann að því að bæta 5 húsvískum eikarbátum í flotann þarna innandyra.

Ekki er þetta allt því rekaviðarfjalir bíða meðferðar í skúrnum á Borgarhóli þar sem 19. aldar skonnortur norðlendinga komast á spjöld sögunnar.

HH



Meistarinn í skúrnum.


Hluti listaverkanna.