Fréttir Norðursiglingar

Síðustu daga hefur óvenjuleg sjón blasað við Húsavíkingum sem og ferðamönnum á svæðinu.

Inn á flóanum og úti fyrir landi hefur sést til fjölda ísjaka. Vegna vestlægra og norðvestlægra vindátta, hafa jakarnir verið að nálgast landið smám saman og voru nokkrir komnir alla leið inn á flóann.

Þessir jakar eru komnir frá Grænlandi og þó það sé ekki algengt nú í seinni tíð, var þetta ekki eins sjaldgæf sjón á síðustu öld. 1968 rak ísjaka á land í Grímsey með farþega um borð en sá var Grænlenskur ísbjörn sem endaði líf sitt í eyjunni en er nú uppstoppaður til sýnis á Safnahúsinu á Húsavík.

Í ferðum Norður-Siglingar í dag, fengu farþegar að komast í návígi við grænlenskan ísjaka þegar skipstjórar okkar tóku krók að einum þeirra.

Meðfylgjandi eru nokkrar myndir sem einn áhafnarmeðlimur tók í morgunferðinni.



Skonnortan Haukur, nálgast einn jakann.


Haukur kominn upp að jakanaum og farþegar fylgjast forvitnir með.


Zodiac Norður-Siglingar fór jafnvel enn nær og um borð þar var erlent myndatökulið.


Í miðju jakans var lítil laug og öldurnar brotnuðu þar inni.


Ísinn var mjög innarlega í flóanum og hér sést Húsavík í bakrunn.


Nærmynd af jakanum en aðeins um 1/10 stendur upp úr sjónum. Sérð þú andlit, falið í ísnum?