Fréttir Norðursiglingar

Nú á dögunum sigldu þrír kappar nýjasta bát Norður-Siglingar, Bjössa Sör til Akureyrar þar sem hafnar verða framkvæmdir á gagngerum breytingum. Skipt verður um mest allt rafmagn í bátnum, bætt verður við öðru salerni, og síðast en ekki síst verður byggður kappi á bátinn yfir fiskilestina þar sem verður farþegasalur.

Báturinn er þar með kominn á upprunaslóðir sínar en í mars á þessu ári verða 30 ár liðin frá því að þessu mikla happafleyi var hleypt af stokkunum hjá Skipasmíðastöð KEA, en báturinn var jafnframt síðasti báturinn sem var smíðaður hjá þeirri stöð.

Það eru skipasmiðirnir Trausti Adamsson og synir hans sem sjá um breytingarnar en þeir hafa séð um flestar meiriháttar breytingar á skipum Norður-Siglingar og unnu þeir einmitt að breytingum fyrsta bátsins, Knarrarins fyrir 11 árum síðan.

HH



Óli Austfjörð skipstjóri í brúarglugganum.


Það getur verið fallegt í utanverðum Eyjafirði.


Nils B. Hailer háseti og leiðsögumaður hjá Norður-Siglingu í kaffi niður í lúkar.


Bjössi kominn að bryggju við slippinn á Akureyri


Trausti Adamsson að vinna að smíðum á kappa sem kemur yfir lestarop Bjössa Sör.