Fréttir Norðursiglingar

Í gær voru í heimsókn hjá Norður-Siglingu starfsmenn Icelandair í London en þeir voru á ferðinni m.a. til að kynna sér starfsemi Norður-Siglingar. Í gegnum tíðina hefur samband Norður-Siglingar við Icelandair verið gott og ekki óalgengt að hópar frá þeim kíki við á Víkinni.

Farið var með hópinn í stutta siglingu um Skjálfanda en Bjössi Sör hafði einmitt komið frá Akureyri kvöldið áður en þar hafði hann verið í gagngerum breytingum og endurbótum.

Siglt var að Lundey og fuglalífið skoðað og svo var tekinn stuttur hringur út á flóa þar sem höfrungar buðu þessa fyrstu hvalaskoðunargesti sumarsins velkomna.

Eftir bátsferð var snætt á Gamla Bauk og gestirnir kynntu sér einnig Hvalasafnið áður en haldið var áfram um landið.

Nú eru aðeins nokkrir dagar í að hin eiginlega hvalaskoðunarvertíð hefjist en þann 1. maí hefjast daglegar brottfarir (kl. 13:30) en í Júní byrjar svo áætlunin að þéttast svo um munar og mest verða á vegum Norður-Siglingar 7 brottfarir á dag í sumar.

Starfsmenn Norður-Siglingar eru nú í óða önn að undirbúa sumarið og hlakka til að sigla með gesti ellefta sumarið.

HH



Hópurinn um borð í Bjössa Sör.