Fréttir Norðursiglingar

Sænskum dögum Húsavík var formlega startað í Sjóminjasafninu á mánudaginn. Reinhard Reynisson, bæjarstjóri setti hátíðina og gat þess að Sænskir dagar væru rökrétt framhald á því sem Húsvíkingar hefðu verið að gera í menningartengdri ferðaþjónustu til þessa. “Það er skýr stefna okkar að Sænskir dagar á Húsavík séu komnir til að vera og að þeir verði fastur liður í menningarlífi Þingeyinga í framtíðinni.” Sagði Reinhard. Ulf Svenér, sendifulltrúi sænska sendiráðsins á Íslandi, var fulltrúi sænsku þjóðarinnar við þessa athöfn og ávarpaði gesti á mjög góðri íslensku. Hann fagnaði mjög þessu framtaki og flutti Húsvíkingum m.a. kveðjur frá vinabæ Húsavíkur í Svíþjóð, Karlskoga.

Norður-Sigling kemur að sænskum dögum með ýmsum hætti en hæst ber að á laugardaginn býður fyrirtækið ásamt veitingastöðunum Sölku og Gamla Bauk upp á svokallaða Landnámsferð í Náttfaravíkur til heiðurs landkönnuðinum Garðari Svavarssyni og landnemanum Náttfara.

Þar verður boðið upp á grillveislu í fjörunni en takmarkað sætaframboð er í þessa ferð. Upplýsingar og bókanir fara fram hjá Norður-Siglingu. Í tilefni þess að sænskir dagar eru haldnir í fyrsta sinn er landnámsferðin þáttakendum að kostnaðarlausu. Fyrstir koma fyrstir fá.

Frekari upplýsingar um Sænska daga eru veittar í síma 464 4300 eða á vef Markaðsráðs Þingeyinga