Fréttir Norðursiglingar

Nú er fyrstu Sænsku dögunum senn lokið og má segja að einn af hápunktunum af dagskránni hafi verið svokölluð Landnámsferð í Náttfaravíkur í gærkvöld.

Það voru Norður-Sigling og veitingahúsið Salka sem buðu um 70 manns að sigla á seglskipinu Hauk og Náttfara vestur í Náttfaravíkur þar sem beið þeirra í Rauðuvík glæsileg grillveisla og varðeldur.

Bónus ferðarinnar var svo að varla var fært yfir flóann fyrir hrefnum, höfrungum og stærðarinnar hnúfubak sem sýndi sig landnemunum.

Að koma í þessar eyðivíkur þar sem Náttfari ku hafa numið land fyrir 1135 árum er einstök upplifun og fannst fólki mikið til landslagsins koma.

Ekki er ólíklegt að ferðin verði endurtekin að ári þar sem gríðarleg ánægja ríkti með skipulag og framkvæmd ferðarinnar.

HH



Rúnar vélstjóri kemur með fyrstu landnemana að landi. Haukur og Náttfari í baksýn.


Kári af Sölku grillar í blíðunni.


Kokkarnir höfðu varla við að skammta hunguðum landnemum.


Aðeins neðar í fjörunni logaði svo varðeldurinn.


Eftir passlega dvöl í Rauðuvík var svo byrjað að ferja fólkið aftur út í bátana.


Um borð í Náttfara á leiðinni aftur til Húsavíkur.