Fréttir Norðursiglingar

Frá upphafi hefur Norður-Sigling lagt mikið upp úr metnaðarfullri leiðsögn um borð í bátunum og að gestir fái sem mest út úr siglingu sinni um hinn merkilega flóa.

Í því skyni eru árlega haldin námskeið og nú í seinni tíð eru þau námskeið af ýmsum toga.

Á dögunum dvöldu starfsmenn félagsins nokkurn tíma í Hvalasafninu þar sem Ásbjörn Björgvinsson leiddi fólkið um safnið og kom svo með marga skemmtilega og fróðlega punkta um viðfangsefni safnsins, hvali og líffræði þeirra.

Gunnar Baldursson Jarðfræðikennari við Framhaldsskólann á Húsavík slípaði svo jarðfræðikunnáttu sjóhundanna en margt merkilegt ber fyrir augu í siglingu um flóann sem vert er að gefa gaum og segja frá, hvað jarðfræði snertir.

Nú annað árið í röð kom svo Arnór Benónýsson hinn frábæri leikstjóri og kennari við Framhaldsskólann á Laugum og tuskaði liðið til í tjáningu og framsögu.

Það er því ljóst að það er fríður hópur hæfileikaríkra og fróðra leiðsögumanna sem siglir undir merkjum Norður-Siglingar um Skjálfanda í sumar sem og endra nær.

HH



Huld Hafliðadóttir ein af reyndari leiðsögumönnum Norður-Siglingar en hún talar Íslensku, Ensku og Þýsku.


Arnór Benónýsson hefur leikstýrt og leikið víða um land í áratugi.


Hluti framsögunámskeiðsins, en skipta þurfti hópnum í tvennt þar sem mikið er að gera í siglingum þessa dagana og ekki geta allir verið á sama tíma í landi, a.m.k. ekki á kristilegum tíma.