Fréttir Norðursiglingar

Það er nú árviss atburður að 3 efstu bekkir Borgarhólsskóla fari haustferð með Norður-Siglingu. Ferðirnar eru mismunandi eftir árum til þess að hver nemandi fái að njóta Skjálfandaflóa á sem fjölbreyttastan hátt og er í hverri ferð viðeigandi fræðsla fyrir nemendurna.

Þetta árið var farið óvenjuseint því ekki gaf á sjóinn fyrr en 18. október. Þá var stefnan tekin að Lundey og var með í för Hjörtur Tryggvason fyrrverandi kennari á Húsavík sem fræddi hann krakkana um jarðfræði svæðisins. Það var mikil stemning um borð og þegar Hjörtur hafði ausið úr viskubrunni sínum um borð í Náttfara þar sem 8. og 9. bekkur voru, var honum skutlað yfir í skonnortuna Hauk þar sem 10. bekkingar fengu að njóta frásagnargleði hans. Að þessu sinni var ekki tekið land í Lundey eins og áætlað var vegna bleytu og erfiðra aðstæðna í eynni. Öllum að óvörum sáust um 6 hnísur mjög vel frá bátunum, en hnísurnar eru minnsta hvalategundin aðeins um 1,5 m að lengd og um 70 kg.

Á heimleiðinni var boðið upp á heitt kakó og kanilsnúða að hætti Norður-Siglingar og yljaði það vel í októberkælunni. Um borð í Hauk spreyttu 10. bekkingar sig á að reisa nokkur segl en vegna vindleysis var ekki siglt án vélarafls að þessu sinni. Vonum við að ungmennin hafi haft gaman að siglingunni og hlökkum við til að sjá þennan fríða hóp að ári.


Frekari ferðasaga og fleiri myndir má sjá á vef Borgarhólsskóla www.borgarholsskoli.is

ÞH/KK