Fréttir Norðursiglingar

Sænskur víkingur hefur undanfarna daga dvalist á Húsavík á vegum Norður-Siglingar. Tilgangur heimsóknarinnar var að þjálfa starfsfólk Norður-Siglingar í siglingum sem og að fínstilla reiðann á skonnortunni Hauk.
Eins og alkunna er bjuggu hinir skandínavísku víkingar yfir afburða siglingakunnáttu sem gerið þeim m.a. kleift að nema Ísland, Grænland og sigla til Vínlands.

Leif Nilson, en það er nafn þessa ágæta siglingakappa, kemur frá Skärhamn sem er bær í vestur-sænska skerjagarðinum. Bærinn er sömu stærðar og Húsavík með um 2.500 íbúa og er á einstaklega fallegum stað, þar sem höfnin sjálf er perla byggðarlagsins. Leif er einn af nokkrum skipstjórum á skonnortunni Atene (www.msatene.com) en hún er 90 tonna glæsilegt skip. Þar, eins og á Húsavík, er lögð sérstök áhersla á siglingar með börn og unglinga. Við hjá Norður-Siglingu erum hæst ánægð með þessa heimsókn og fengum staðfestingu reynds manns á því, að skonnortan Haukur er hið besta skip og reiðinn eins og best gerðist á skútuöld. Það er okkar von að þessi koma Svíans hingað leiði til gagnkvæmra heimsókna milli bæjanna tveggja í náinni framtíð.

Myndirnar hér að neðan voru teknar á meðan dvöl Svíans stóð.

HS



Hinn sænski garpur á góðuri stundu í nýjum ´bjórkjallara´ Norður-Siglingar


Gæti Húsavíkurfjall hafa verið orðið hvítt þegar Garðar Svavarsson sigldi inn Skjálfanda haustið 870?


Frammastrið á Hauknum ber fjögur af sex seglum reiðans, frá vinstri; klífir, stagfokka, skonnortutoppsegl, skonnortusegl.


´Detta är livet´ sagði Leif þegar öll segl voru sett. Þórunn við stýrið, Bjössi Sör og Leif njóta augnabliksins.


Leif hugar að reiðanum, Víknafjöll í baksýn


Haldið til hafs