Fréttir Norðursiglingar

Garðarshólmi er verkefni sem hefur verið í gangi hjá Norður-Siglingu í áraraðir og miðar að því að setja á stofn fræðasetur á Húsavík, þar sem landnám norrænna manna á Íslandi hófst.

Garðarshólmi verður tileinkaður sænska landkönnuðinum Garðar Svavarssyni og samferðamanni hans, Náttfara, sem sigldi til Íslands árið 870. Garðar sigldi fyrstur manna í kringum landið og dró af því þá ályktun að það væri eyja, hann hafði vetursetu á Húsavík en hélt svo aftur til Svíþjóðar og lofað landið mikið. Náttfari varð hinsvegar eftir, og þó hann hafi aldrei verið viðurkenndur sem slíkur, var hann fyrsti norræni landnámsmaður Íslands.

Að Garðarshólmaverkefninu standa Norður-Sigling og Húsavíkurbær ásamt fleiri aðilum. Um helgina var stigið stórt skref í þróun verkefnisins þegar skrifað var undir samstarfsyfirlýsingu milli Garðarshólmaverkefnisins og Víkingaheims í Reykjanesbæ, sem mun stuðla að samstarfi þessara aðila um kynningu og ýmsa þætti í undirbúningi verkefnanna. Bæjarstjórarnir Árni Sigfússon og Reinhard Reynisson skrifuðu undir samstarfsyfirlýsinguna fyrir hönd verkefnanna tveggja.

Undanfarin ár hafa verkefnin tvo verið undirbúin á metnaðarfullan hátt, hvort í sínu bæjarfélagi og fjalla þau m.a. um þá miklu siglingarkunnáttu sem lá til grundvallar útrásar norrænna manna til Færeyja, Íslands, Grænlands og að lokum til Vínlands.

Sýningin á Reykjanesi hefur að þungamiðju varðveislu Íslendings, í miðju sýningar frá Smithsonian safninu í Bandaríkjunum, Vikings the North Atlantic Saga. Um er að ræða heildarkynningu á sögu víkinga Norður-Atlantshafsins. Þar verður jafnframt boðin söguslóðakynning þar sem áhugaverðir sögustaðir á landinu fá fyrstu kynningu við “hliðið inn í landið”.

Garðarshólmi mun einnig taka á þessari merkilegu sögu en að auki mun hann fjalla um samspil vistfræði og menningar á landnámsöld og siglingaafrek þeirra manna sem fyrstir námu hér land.

Það er markmið með samstarfinu að stuðla að hagkvæmri úrvinnslu kynningarefnis, sérstaklega margmiðlunarefnis sem getur um margt verið svipað að grunnefni. Það er mat samstarfsaðila að samvinna muni stuðla að metnaðarfyllra sýningarhaldi og betri markaðssetningu á sögulandinu.

Frekari upplýsingar um Garðarshólma verður að finna innan skamms hér á heimasíðu Norður-Siglingar.



Bæjarstjórarnir Árni Sigfússon og Reinhard Reynisson skrifa undir samstarfsyfirlýsinguna fyrir hönd verkefnanna tveggja.


Aðstandendur Garðarshólma & Víkingaheims.


Skýrsla sem gefin var út af aðstandendum Garðarshólma fyrr á árinu.


Sóley Stefánsdóttir hönnuður hefur tekið virkan þátt í verkefninu og hefur hún m.a. hannað útlit sýningarinnar sem og skýrsluna hér að ofan. Sýningin mun að stórum hluta byggja á margmiðlunarhönnun, sem mun gera hana lifandi og áhugaverða fyrir alla aldurshópa.


Norræn menning verður til umfjöllunar í sýningunni og verður sá þáttur hennar unninn í samstarfi við Historiska Museet í Stokkhólmi. Meðal umfjöllunarefna verða; Fjölskyldulíf, heimilishald, mataræði, konur í karlaheimi, þrælar, trúarbrögð, rúnasteinar, handverk, áhöld og verkfæri, lífið um borá á siglingum og ástæður útrásar hinna norrænu manna.


Annar þáttur í sýningunni verður þróun bátasmíða frá Knerri Garðars til nútímans. Hugmyndin er að setja þessa sögu upp í tímalínu sem byrjar á Knerri Garðars og endar á Knerri Norður-Siglingar á Húsavík. Á Tímalínunni verður ýmsum atburðum sem þekktir eru úr veraldarsögunni bætt við til að auðvelda gestum til að staðsetja sig í tíma.