Fréttir Norðursiglingar

Fyrsta ferð sumarsins var farin í dag, 30. apríl og voru það 13 glaðlegir ferðamenn sem riðu á vaðið. Veðrið var eins og best verður á kosið, bjart og stillt og aðstæður allar hinar bestu.

Lagt var úr höfn á Bjössa Sör og var skipstjóri Hörður Sigurbjarnarson og leiðsögumaður Nils B. Hailer. Eftirvæntingin var mikil vegna fyrstu ferðarinnar og ekki skemmdi það fyrir að sást hafði til hvala í gær þegar Bjössi Sör fór í prufusiglingu.
Ekki þurftu farþegar og áhöfn að bíða lengi uns fyrsti blásturinn kom í ljós og voru þar á ferð tveir spakir hnúfubakar. Í ferðinni sáust alls 4 hnúfubakar, tvær hrefnur og tveir selir auk fjölda fugla þ.á.m. lunda.

Það voru því brosandi andlit sem komu siglandi í höfn eftir vel lukkaða ferð. Tókum við tvö pör tali og bað þau um að lýsa upplifun sinni á ferðinni.

Philippe og Aurelia frá Frakklandi og Marcel og Saskia frá Hollandi voru öll að koma úr sinni fyrstu hvalaskoðunarferð en þó höfðu þau frönsku séð hvali frá landi í S-Afríku. Aðspurð sögðu þau að ferðin hefði uppfyllt væntingar þeirra, þau hefðu siglt út á flóann og fljótlega séð fyrsta hvalinn og vel hefði gengið að nálgast hann. Skipstjórinn hefði sýnt nærgætni og þau hefðu ekki fengið á tilfinninguna að verið væri að elta hvalinn. Saskia sagði að leiðsögnin og upplýsingarnar sem leiðsögumaðurinn gaf hefði verið fræðandi og og skemmtilegar og hann hefði virkilega lifað sig inn í auganblikið. Aurelia tók undir með það og sagði að eftir ferðina væru þau mörgu fróðari um hegðun og líffræði hvala. Marcel talaði um að ákafi leiðsömannsins hefði gefið ferðinni skemmtilegan blæ og gefið ferðinni aukið gildi. Sú staðreynd að leiðsögumaðurinn hafi margsinnis séð hvali en væri samt svo hrifinn og ákafasamur hefði gert upplifunina enn eftirminnilegri.

Bæði Hollendingarnir og Frakkarnir sögðu það mjög líklegt að þau myndu fara aftur í hvalaskoðun innan skamms þar sem þessi reynsla hefði verið svo gefandi. Köld en gefandi bættu þau svo við:)

Öll voru þau sammála um að rúsínan í pylsuendanum hefði þó verið að fá heitt súkkulaði og kanilsnúða á heimleiðinni, þó að samkvæmt dagatalinu væri sumar hefði verið örlítið kalt á sjónum. En Ísland heitir jú ekki Ísland fyrir ekki neitt!

ÞH



Farþegarnir komnir um borð og eftivæntingin skín úr andlitum þeirra


Bjössi Sör leggur úr höfn


Ekki leið á löngu fyrr en fyrsti hvalur sumarsins sýndi sig og var það hinn myndarlegasti hnúfubakur!


Alls sáust 4 hnúfubakar í ferðinni og 2 hrefnur. Hér sést einn hnúfubakanna stinga sér í djúpkaf og lyfta sporði við síðu bátsins


Það voru brosandi andlit sem komu í land stuttu síðar, ánægð með reynslu dagsins:)


Frá vinstri, Aurelia Ringhetti og Philippe Dune frá Frakklandi, Marcel Cachia og Saskia Bezoen frá Hollandi.