Fréttir Norðursiglingar

Í dag var einkar fallegt veður á sjónum og líkt og undanfarna daga gekk ferðin vel. Alls sáust 3 hnúfubakar, 2 eða 3 hrefnur, nokkrar hnísur og 1 selur.

Um borð voru 42 farþegar frá ýmsum þjóðum, m.a. Danmörku, Englandi, Frakklandi, Póllandi, Þýskalandi og Íslandi en síðast en ekki síst voru með í för 14 heimilismenn á Dvalarheimilinum Hvammi á Húsavík auk 2 starfsmanna. Lengi hefur staðið til að Norður-Sigling byði heimilismönnum í sjóferð og var upplagt að nýta góða veðrið því sjórinn var spegilsléttur og aðstæður allar hinar bestu. Svo skemmtilega vildi til að í dag er 86 ára afmæli Þórunnar Guðmundsdóttir frá Siglufirði sem býr á Hvammi. Hún hefur frá upphafi fylgst með og stutt við uppbyggingu fjölskyldufyrirtækisins Norður-Siglingar því hún er móðir Sigríðar Þ. Einarsdóttur, konu Harðar framkvæmdarstjóra. Til gamans má geta að hún hefur m.a. prjónað hundruði ullarvettlinga sem farþegar fá að láni þegar kalt er í veðri.

Gamla fólkið naut ferðarinnar afar vel í veðurblíðunni enda fallegt á flóanum með Kinnarfjöllin í baksýn, tignarleg með snæviskreyttar hlíðar og tinda.

Fleiri afmælisbörn voru um borð því með í för var breti sem í dag fagnaði 60 ára afmæli sínu.

Það má því segja að ferðin hafi verið vel lukkuð í alla staði og vonum við að heimilismenn Hvamms hafi í dag bætt fallegum myndum í minningarbankann.

ÞH



Nokkrir herramenn frá Hvammi bíða brottfarar fyrir framan Gamla Bauk


Í ferðinni sáust hrefnur. Hér er ein í æti ásamt nokkrum ritum.


Tveir hnúfubakar voru skoðaðir í ferðinni og sást til þess þriðja. Hér lyftir hnúfubakur sporðinum tignarlega og fer í djúpkaf.


Hér koma farþegar til baka úr ferðinni, brosandi út að eyrum, jafnt ungir sem aldnir.


Nöfnurnar Þórunn Guðmundsdóttir (t.h.)afmælisbarn og dugnaðarforkur. Þórunn Harðardóttir (t.v.) afhendir afmælisgjöf frá Norður-Siglingu.


Lengst t.h. er annað afmælisbarn dagsins og tekur hann hér við afmælisgjöf frá Norður-Siglingu. T.v. Nils og í miðjunni Þórunn.