Fréttir Norðursiglingar

Mikið hefur verið um sérferðir hjá Norður-Siglingu síðustu daga og óhætt er að segja að ferðirnar hafi verið eins fjölbreyttar og þær voru margar.


Fyrst ber að nefna miðnætursiglingu til Grímseyjar í tilefni Jónsmessunnar, en um 30 farþegar sigldu með Náttfara til Grímseyjar aðfaranótt sunnudags.
Lagt var af stað kl. 20 á laugardagskvöld og hófst ferðin á hvalaskoðun á Skjálfanda. Komið var að bryggju í Grímsey um miðnætti og var þá boðið upp á súpu og gönguferð þar á eftir í miðnætursólinni.
Litið var inn í minjagripaverslun, fuglalífið í eynni var skoðað og hápunkturinn var svo að ganga yfir heimskautsbaug nyrðri.
Það voru svo þreyttir en ánægðir farþegar sem stigu í land á Húsavík um kl. 7 á sunnudagsmorgun.


Sl. laugardagskvöld var svo fráfarandi bæjarstjórn Húsavíkur kvödd með mikilli grillveislu í Rauðuvík undir Kinnarfjöllum. Farið var á Knerrinum og voru farþegar brosandi þegar lagt var að landi eftir velheppnaða ferð með Árna Sigurbjörnssyni skipstjóra.


Í síðustu viku var það svo föngulegur hópur karlfyrirsæta sem sigldu um flóann á skonnortunni Hauk. Þar var á ferðinni starfslið fataverslunarinnar Saks Fifth Avenue sem statt var á Íslandi við myndatökur fyrir nýjan bækling verslunarinnar sem kemur út í september. Var siglingin á Hauk hluti af 10 daga ferð hópsins um Ísland, þar sem myndir voru teknar í íslenskri náttúru.


Eftirfarandi myndir voru teknar í ferðinni til Grímseyjar og voru það skipstjórinn Einar Magnússon og Þórunn Harðardóttir leiðsögumaður og vélstjóri sem tóku þær.



Huld H.



Grímsey í miðnætursólinni.


Margt skemmtilegra muna var að finna í minjagripaversluninni í Grímsey.


Kirkjan í Grímsey.


Útsýnisskífa í Grímsey.


Farið var í gönguferð um eynna í kvöldroðanum.


Fallegt í eynni.