Fréttir Norðursiglingar

Afar líflegt hefur verið fyrir neðan bakkann á Húsavík í dag og fjöldi ferðamanna spókað sig um á hafnarsvæðinu í sól og sumaryl. Reyndar var hitinn það mikill að kröftugur hitaskúr skellti sér yfir víkina og bleytti upp í mannskapnum rétt sem snöggvast.

Mikið hefur verið um sérferðir og aukabrottfarir hjá Norður-Siglingu undanfarið og var dagurinn í dag engin undantekning en nær 300 farþegar nutu veðursins og hvalanna í 6 brottförum með 4 bátum Norður-Siglingar. Eftir hádegið sáust 5-6 hrefnur og þar af ein sem lék sér við báta Norður-Siglingar í um hálftíma! Einnig hafa sést Hnúfubakar, höfrungar og meira að segja ein Steypireiður.

Það er því óhætt að segja að líflegt hafi verið á flóanum í dag og það voru skælbrosandi ferðamenn sem komu af sjónum, sælir og glaðir með upplifun dagsins.

ÞH



Hnúfubakur lyftir sporðinum tignarlega!
mynd:ÞH