Fréttir Norðursiglingar

Hin svokallaða Húsavíkurhátíð var haldin með pompi og prakt vikuna 24. til 30. júlí. Um 4000 manns eru taldir hafa sótt Húsavík heim um helgina þegar hátíðin náði hámarki.
Dagskráin hófst mánudaginn 24. júlí með siglingarnámskeiði fyrir börn, listasmiðju og fyrirlestrum, auk þess sem hátíðin var formlega sett þá um daginn af forseta Íslands, herra Ólafi Ragnari Grímssyni. Í vikunni var síðan þétt dagskrá og mátti hver finna eitthvað við sitt hæfi. Veðrið spilaði svo stórt hlutverk þegar líða fór á vikuna og var rjómablíða á föstudag og laugardag. Hitinn fór yfir 20 stig á föstudag og var stemmningin eins og best verður á kosið.


Ljóst er að Húsavíkurhátíðin (Mærudagar) hefur fest sig í sessi meðal Íslendinga, þá sérstaklega meðal brottfluttra Húsvíkinga sem virðast í auknum mæli stíla inná hátíðina og má sjá sömu andlitin á bryggjusvæðinu ár eftir ár.

Hér fyrir neðan má sjá svipmyndir frá hátíðinni sem teknar voru af Þórunni Harðardóttur sem einnig var helsti skipuleggjandi Húsavíkurhátíðarinnar.



Huld H.



Landnámssigling í Náttfaravíkur.
Þrír bátar Norður-Siglingar sigldu með gesti yfir í Náttfaravíkur þar sem boðið var upp á grillmat og meðlæti. Ferðin var í boði Norður-Siglingar, Sölku og Gamla Bauks.


Grillmeistarar.
Jónas og Guðni frá Sölku og Gamla Bauk sáu um að grilla fyrir gesti og sýndu þeir snilldartakta við grillið, enda ekki alls óvanir þegar matseldin er annars vegar!


Glaðir gestir í Rauðuvík.


Siglinganámskeið fyrir börn og unglinga.
Siglinganámskeiðið gekk mjög vel og voru það glaðir þátttakendur sem sýndu afrakstur námskeiðsins á laugardeginum.


Steyptir munir í garðinn þinn.
Boðið var upp á ókeypis námskeið í listmunagerð. Var um að ræða muni úr steypu ætlaða til garðskreytinga og voru þátttakendur sælir með kennsluna.