Fréttir Norðursiglingar

Þeir sem áttu leið um hafnarsvæðið síðustu daga júlímánaðar hafa eflaust rekið augun í glæsilegan einmöstrung sem lá við suðurgarðinn. Þar var á ferðinni Dagmar Aaen, Þýskur kútter, sem byggður var í Esbjerg í Danmörku árið 1931.

Áhöfn skútunnar er að stærstum hluta þýsk og er eigandinn, þjóðverjinn Arved Fuchs, vel þekktur í sínu heimalandi fyrir vinnu sína við rannsóknir á veðurfari. Fuchs er afar virtur á sviði veðurfarsrannsókna og hefur auk þess unnið mikið fræðslu- og kynningarstarf tengt rannsóknum sínum. Dagmar Aaen kom hér síðast í höfn árið 1993, þá á leið norðvestur yfir Atlanshafið og höfðu skipverjar nú orð á því hve gaman væri að sjá þá uppbyggingu sem orðið hefur, bæði ofan “bakka” og neðan og hve skemmtilegur hafnarbær Húsavík væri orðin.

Að þessu sinni var kútterinn á leið til Grænlands þar sem áhöfnin mun rannsaka hafís og áhrif hans á lífríki sjávar.

Þegar Dagmar Aaen sigldi svo úr höfn var við hæfi að skonnortan Haukur fylgdi þessu merka skipi áleiðis út á flóann og ekki er loku fyrir það skotið að eigendur skipanna munu standa að einhverjum sameiginlegum verkefnum í framtíðinni.

Huld H.



Arved Fuchs við stýrið þann 4. ágúst áður en lagt var úr höfn eftir ánægjulega dvöl á Húsavík


Skonnortan Haukur og Kútterinn Dagmar Aaen draga upp segl, drepa á vélum og sigla af stað.


Glæsileg fley... svo lík en samt svo ólík.


Stefnan tekin á Grænland


Áhöfnin kveður