Fréttir Norðursiglingar

Árleg árshátíð Norður-Siglingar var haldin með pompi og prakt í gærkvöldi. Eins og undanfarin ár var haldið af stað í óvissuferð og voru um 30 manns mættir fyrir utan Gamla Bauk kl.17. Að þessu sinni var ferðinni heitið niður að ósi Laxár, nánar tiltekið í fjöruna undir Ærvíkurbergi þar sem búið var að hlaða bálköst og útbúa sæti úr rekaviðardrumbum og bobbingum fyrir gestina.

Eftir ljúffengan forrétt og að loknum stórskemmtilegum leikjum og söng var gestum boðið uppá grillað lamb og meðlæti. Smakkaðist það árshátíðargestum afar vel og voru erlendu gestirnir sérstaklega hrifnir af íslenska lambinu.

Bálkösturinn var síðan tendraður, en einnig var gestum boðið að skella sér á sjóskíði en sökum þess hve kalt var í veðri létu sér flestir nægja að horfa á. Það voru hins vegar kempurnar Hilmar Valur og Heimir sem létu sig vaða í sjóinn en gekk þó eitthvað brösulega að komast úr sjónum og upp á yfirborðið...


Við látum myndirnar tala sínu máli!




Huld H.



Bálkösturinn hlaðinn.


Meðal drumbanna var að finna þennan forkunnarfagra gíraffa sem Hilmar Valur Gunnarsson var svo lánsamur að fá að sitja.


Hin finnska Sara Tobiasson lét ekki sitt eftir liggja.


Agnes Árnadóttir býður upp á dýrindis snittur á bakka.


Line Werner stjórnaði söng og spilaði undir á gítar. Að sjálfsögðu voru allar helstu dægurperlur Íslands sungnar.


Hér sést Hilmar Valur borubrattur festa á sig sjóskíðin.