Fréttir Norðursiglingar

Á haustmánuðum, eða þegar skonnortan Haukur sigldi umhverfis landið var komið inn til Ólafsvíkur og legið þar utan á glæsilegu eikarskipi. Kunningsskapur tókst með eigendum skipanna tveggja og úr varð að Norður-Sigling festi nokkru síðar kaup á skipinu, Sveinbirni Jakobssyni eldri.

Risjótt tíðarfar varð til þess að skipið kom ekki til Húsavíkur fyrr en í byrjun nóvembermánaðar en nú liggur það í Húsavíkurhöfn og bíður breytinga.

Skipið er 103 brúttórúmlestir (109 brt) og tæpir 28 metrar á lengd (Til samanburðar er Náttfari 57 brúttórúmlestir og 23 metrar).

Skipið er eitt af þeim síðustu af þessari stærðargráðu sem eftir er í þokkalegu standi og raunar er ástand bátsins mjög gott enda er útgerðarsaga þess einstök. Skipið var smíðað í Esbjerg árið 1964 fyrir útgerðarfélagið Dverg í Ólafsvík og var gert út þaðan samfellt þangað til því var lagt í sumar.

Ávallt hefur skipið reynst hið mesta happafley og vonandi verður svo áfram með breyttu hlutverki. Ekki hefur verið ákveðið hvert nafn skipsins verður.

HH



Báturinn við komuna til Húsavíkur.


Þráinn Sigtryggsson eigandi og útgerðarmaður Sveinbjörns og Heimir Harðarson við undirskrift sölupappíra.


Vélbúnaður er allur í góðu lagi en í bátnum er m.a. 500 hestafla Mirrlees Blackstone vél og ný cummins ljósavél.


Báturinn gerður klár fyrir brottför frá Ólafsvík en þangað mun hann vonandi koma aftur síðar í kurteisisheimsókn.


Báturinn er hið mesta sjóskip og fór vel með mannskapinn, hér á leið yfir Breiðafjörð í bræluskít.