Fréttir Norðursiglingar

Í janúar síðastliðnum fór fríður flokkur á vegum Norður-Siglingar til Lundúna til þess annarsvegar að taka þátt í Ævintýraferðasýningu og hinsvegar til þess að fara á hina gríðarstóru "Lundúna Bátasýningu" eða London Boat Show. Útaf fyrir sig var bátasýningin næg ástæða til að leggja London undir fót en í þetta sinn hékk nokkuð á spýtunni en skonnortan Haukur fékk umfjöllun og reyndar forsíðumynd af sér í einu virtasta tímariti heims á sínu sviði, þ.e. "Classic Boat". Það er auðvitað mikill heiður fyrir þessa Húsvísku skonnortu að vera "forsíðustúlkan" á slíku riti og óvíst að Íslenskir bátar hafi áður prýtt síður þessa tímarits, hvað þá kápuna.

Í Norður-Siglingarhópnum að þessu sinni var einvala lið sem átti það m.a. sameinlegt að vera miklir bátanördar og reyndar það líka að vinna nú að því að gera upp 18 feta seglskútu á Húsavík, Sæbjörgu að nafni sem mun prýða höfn og flóa á sumri komanda. Í hópnum voru: Sigríður Ragna Sverrisdóttir, Einar Ófeigur Magnússon, Hörður Sigurbjarnarson ásamt undirrituðum.

Heimir Harðarson



Sigga Ragna ásamt virðulegum manni sem var öllum hnútum kunnugur í reipabransanum.


Stund milli stríða hjá Herði og Einari


John hjá "Traditional Boat Supplies" var skemmtilegur fýr og seldi okkur mikið af delludóti og glæsilegum kalfattgræjum. Hann fullyrti ennfremur að hann væri hraðasti kalfattari heims og hafa skal það fyrir satt þar til annað kemur í ljós.


Classic Boat básinn var vel sóttur og reyndar svo að þegar 8 af 10 dögum sýningarinnar voru liðnir seldist Febrúar-útgáfan (sú með Hauknum) upp.