Fréttir Norðursiglingar

Eins og fram kom í síðasta Skarpi stendur Gamli Baukur fyrir menningardagskrá á Gamla Bauk, undir formerkjunum “Betri Bragur í Bauk,” þar sem boðið verður upp á tónlist og mat við hæfi. Meðal þeirra sem eiga eftir að koma fram á næstunni á Gamla Bauk í þessari metnaðarfullu dagskrá eru Tríó Björns Thoroddsen og Andrea Gylfadóttir, Ljótu hálfvitarnir, Tríó Láru Sólveigar, hljómsveitin Barduka sem skipuð er Hjörleifi Vals og félögum og fleiri frábærir tónlistarmenn.

Fyrsta útspilið á þessari menningardagskrá voru tónleikar hljómsveitarinnar Park Project s.l. laugardagskvöld. Þessi blús og jazzsveit var skipuð þeim Pálma Gunnarssyni á bassa, Gunnlaugi Briem á trommur, Agnari Má Magnússyni á hljómborð og Kristjáni Edelstein á gítar. Og síðast en ekki síst söngkonunni Hrund Ósk Árnadóttir.

Skarpur sendi fulltrúa á tónleikana, sem voru einfaldlega frábærir, og sem betur fer mættu margir og nutu vel þess sem í boði var. Þarna voru náttúrlega margreyndir snillingar á ferð svo sem fyrirfram var vitað, en samt kom ókunnugum á óvart frábær gítarleikur Kristjáns Edelstein, sem oftar en ekki hefur haldið sig baksviðs í músíkinni á undanförnum árum. Allir vissu auðvitað um snilli Pálma og Gulla Briem, en unga fólkið Agnar Már og Hrund Ósk komu viðstöddum skemmtilega á óvart með sérdeilis magnaðri frammistöðu. Og Hrund er alveg augljóslega einhver alefnilegasta söngkona á þessu sviði hérlendis og þó víðar væri leitað og var einstaklega hrífandi í sínum flutningi og ekki síður sviðsferð.

Byrjunin á Betri Brag í Bauk var sem sé mögnuð og vonandi að framhaldið verði á sömu nótum.

Fréttin er tekin af www.skarpur.is