Fréttir Norðursiglingar

Það má með sanni segja að það sé mikið að gera hjá Norður-Siglingu í upphafi hverrar vertíðar. Starfsmenn fyrirtækisins eru þó ekki einungis uppteknir við að sigla og sýna hvali. Verklegar framkvæmdir eru einnig þó nokkrar og taka sinn tíma. Til viðbótar þarf að taka alla bátana í slipp og annast viðhald og skoðun á þeim.

Skonnortan Haukur var síðastur báta Norður-Siglingar til þess að fara í slipp í gær og með því eru allir bátar fyrirtækisins að verða tilbúnir fyrir sumarið. Haukur á fyrir höndum annars konar verkefni en hvalaskoðun, en skonnortan mun fara í 3 daga siglingu norður fyrir heimskautsbaug, með viðkomu m.a. í Flatey, Grímsey og Siglufirði. Enn eru nokkur pláss laus, áhugasamir eru velkomnir að hafa samband í síma: 464-7272 eða senda póst á info@northsailing.is.

Önnur verkefni sem verið er að sinna þessa stundina eru smíði á nýjum stiga niður á Svartabakka þar sem Kaffi Skuld stendur. Gamli stiginn sem var fyrir var orðinn of þröngur enda hefur umferðin aukist töluvert með tilkomu Kaffi Skuldar.

HSH