Fréttir Norðursiglingar

Í gærmorgun sigldu farþegar Norður-Siglingar fram á heldur betur hressan hnúfubak sem var að gera léttar æfingar fyrir komandi átök dagsins. Ekki nóg með að hann stykki upp úr sjónum margoft, heldur var hann líka með heilmikil sporðaköst og bægslagang.

Það er alls ekki á hverjum degi sem við erum svo heppin að verða vitni að slíkum æfingum og hvað þá í þeirri veðurblíðu sem Skjálfandaflói bauð upp á í gærmorgun.

Síðustu daga hefur verið mikið af hrefnum í flóanum, allt upp í 7 dýr í einni ferð, sem er afar ánægjulegt því þær hafa ekki verið mjög áberandi í sumar.

Meðfylgjandi myndir tók Himmi, einn af leiðsögumönnum Norður-Siglingar, af æfingum hnúfubaksins.


HVG



Sporðurinn í fullri reisn.


Sporðaköst með Kinnarfjöllin í baksýn.


Farþegarnir kunnu vel að meta æfingar hnúfubaksins.


Tilkomumikil sjón að sjá ca. 30 tonn af hval koma upp úr sjónum.


Að lokum renndi hann sér á hliðinni tæpan meter frá bátnum og veifaði bless.