Fréttir Norðursiglingar

Húsavíkurhátíð lauk í gær eftir viku menningar og skemmtidagskrá sem fór vel fram í þokkalegu veðri.

Norður-Sigling lét ekki sitt eftir liggja í framlagi til hátíðarinnar en alls sigldu um 400 manns frítt með bátum félagsins í samtals þremur ferðum:

Landnámssiglingin svokallaða þegar fólk upplifir að sigla vestur yfir flóann í slóð Náttfara og þræla hans og taka land í Náttfaravíkum er orðin að einum af hápunktum Sænskra daga má segja. Í þetta sinn þáðu tæplega 250 manns boð Norður-Siglingar og Sölkuveitinga en því miður komust færri að en vilja en takmörk eru fyrir því hve marga er hægt að flytja í svona ferð ekki síst þar sem ferja þarf fólk í land á léttbátum. Einnig er það ekki hrist fram úr erminni að grilla ofan í slíkan fjölda, dýrindis lambasteik með tilheyrandi, en það fóru kokkarnir af Gamla Bauk og Sölku létt með og eiga heiður skilinn. Einnig ber að þakka frábæra frammistöðu Björgunarsveitarinnar Garðars sem hjálpaði til við verkefnið.

Á miðnætti aðfararnótt laugardagsins sigldu svo tæplega 90 manns með Náttfara í hina árlegu miðnætursiglingu út á flóann.

Mærusigling var síðan farin á skonnortunni Hauk á laugardeginum þar sem 45 farþegar nutu þess að sigla seglum þöndum og þenja sig út af mæru á meðan.

Meðfylgjandi myndir tók Hilmar Valur einn af hinum vösku ferjumönnum og bryggjusmiðum sem eyddi heilum degi í Náttfaravíkum við undirbúning Landnáms 2007, fimmtudaginn sl.

HH