Fréttir Norðursiglingar

Árleg árshátíð Norður-Siglingar var haldin með pompi og prakt síðastliðinn fimmtudag. Alls mættu rétt um 40 manns og var hópnum smalað upp í rútu við Gamla Bauk. Lagt var af stað út í óvissuna um klukkan 14.

Fyrsti áningarstaður var við Goðafoss, þar sem boðið var upp á léttar veitingar frá Heimabakaríi. Eftir mátulegt nestisstopp var brunað sem leið lá í bruggverksmiðjuna Kalda á Árskógsströnd, en óhætt er að segja að sú heimsókn hafi komið verulega á óvart þar sem mjög svo misvísandi upplýsingar voru hafðar við í rútunni. Að lokinni léttri fræðslu og hóflegri smökkun var haldið að útivistarsvæði skáta að Hömrum. Þar biðu starfsmenn svæðisins með skipulagða leiki fyrir hópinn og var sprellað í dágóða stund. Að leikjum loknum var komið að kræsilegu grillhlaðborði að hætti Greifans, sem eins og við var að búast bragðaðist með eindæmum vel. Þegar allir voru orðnir vel mettir tóku við skemmtiatriði frá árshátíðarnefnd og stórhljómsveitinni Ljótu hálfvitunum, eða a.m.k. vasaútgáfu af þeirri sveit.

Á milli atriða var svo dregið í veglegu happdrætti þar sem meðal annars var 25 þús. kr gjafabréf á flug með Icelandair, gisting fyrir tvo á Fosshótelum, máltíð fyrir tvo á Sel Hótel Mývatni, Fótsnyrting á Hilmu (þ.e.a.s. Snyrtistofunni), 16 manna marsípanterta frá Heimabakaríi og Hvalaskoðun fyrir einn með Norður-Siglingu ásamt fleiri minni vinningum.

Það var svo glaður og þreyttur hópur sem renndi inn á Húsavík að ganga þrjú um morguninn og er óhætt að segja að þessi ferð hafi tekist einstaklega vel og verði lengi í starfsmanna minnum.

Hér að neðan látum við fylgja nokkrar myndir úr þessari skemmtilegu ferð.


HH
HVG
HH