Fréttir Norðursiglingar

Nú nálgast júlí óðfluga og frá og með 1. júlí tekur ný áætlun brottfara gildi.

Lítið vantar í að Hildur verði fullklár.  Farið var á henni í siglingu með nokkrum gestum og þar á meðal vönu siglingafólki.   Talið var að vel hefði gengið að sigla henni, bæði í hægum vindi og eilítið knappari.

Garðar er við bryggju og unnið hefur verið að því statt og stöðugt að ljúka við hann.  Enn er töluvert verk fyrir höndum svo sem að mála, setja í hann bekki og öryggisbúnað og margt fleira.

Eins og fram hefur komið hafa tafir orðið á afhendingu segla fyrir Skonnortuna Hildi og að auki var vesen með skrúfubúnaðinn en nú sér fyrir endann á þessu öllu og fljótlega siglir hún af stað seglum þöndum áleiðis til Húsavíkur.

Stórum áfanga var náð í slippnum í dag þegar Garðar mastur var sett upp og í framhaldi af því var hann sjósettur.

Vinna í Garðari gengur vel og innan tíðar mun báturinn fara að sigla um Skjálfandaflóa með eftirvæntingafulla ferðamenn um borð.

Undanfarna daga hefur fáum leiðst úti á Skjálfandaflóa. Veðrið hefur leikið við okkur, stanslaust sólskin ef frá er talinn laugardagurinn þegar dimmdi með þoku. Lífríkið hefur verið með besta móti, mikið fuglalíf og fjöldi hvala að sama skapi að aukast.