Fréttir Norðursiglingar

Húsavíkurhátíð - Sænskir dagar og mærudagar, eru nú í fullum gangi, hitinn á Húsavík hátt í þrjátíu stig, ja eða 40.

Bærinn er fullur að fólki og frábær mæting hefur verið á flesta viðburði en vegna anna verður ekki sagt nánar frá þessu að sinni. Við hvetjum hinsvegar alla sem þetta lesa til að fjölmenna til Húsavíkur og taka þátt í gleðinni.

Húsavíkurhátíð; Mærudagar & Sænskir dagar, var sett með formlegum hætti í gær (mánud.) í Safnahúsinu á Húsavík. Það var forseti Íslands, Hr. Ólafur Ragnar Grímsson sem setti hátíðina og opnaði um leið sænska glerlistasýningu frá Hönnunarsafni Íslands.

Svo sem ekki margt um undanfarna daga að segja nema að hnúfubakar hafa enn verið að brillera og stolið athyglinni í hverri ferð.

Mikið hefur verið um stökk og læti hjá þessum miklu dýrum en hnúfubakar geta orðið 16 metrar á lengd og vegið allt að 30 tonnum og því er það tilkomumikil sjón svo ekki sé meira sagt þegar þeir taka á loft og ekki er lendingin síðri.

Undanfarna daga hafa hnúfubakar verið í aðalhlutverki á flóanum þó einnig hafi sést í steypireyðar, hrefnur, hnísur og höfrunga. Ákveðnir einstaklingar hafa verið afar rólegir og svamlað í kringum bátana, sýnt sig og séð aðra.

Meðfylgjandi myndir voru teknar á dögunum.

HH

Bátar Norður-Siglingar hafa í dag siglt um flóann í blíðskaparveðri og séð 4 hvalategundir í nær öllum ferðum, þ.e. höfrunga, hrefnur, hnúfubaka og steypireyðar!

Lífríkið á Skjálfandaflóa er ævintýri líkast þetta sumarið og njóta farþegarnir þess í alla staði. Margir ferðamenn fara í fleiri en eina ferð og á þriðjudaginn var fóru hjón í fjórar ferðir með Norður-Siglingu sama daginn! Þau sögðu að það sjá Steypireyðar í aðeins nokkra metra fjarlægð væri einstök lífsreynsla og ólíklegt að þau myndu upplifa þetta aftur á lífsleiðinni. Því ákváðu þau að skella sér í eins margar ferðir og mögulegt var á einum degi.

Allir 4 bátar Norður-Siglingar fóru á sjó nú í morgun og hefur sést a.m.k. ein steypireyðar og hrefnur það sem af er ferðar.

Hvalaskoðun á Skjálfanda hefur gengið framar öllum vonum síðustu daga og vikur. Eins og áður hefur komið fram er þetta besta sumarbyrjun í sögu Norður-Siglingar hvað varðar hvali og lífríki í flóanum.

Starfsmannasíða Norður-Siglingar hefur heldur betur fengið andlitslyftingu, en bæði hafa ný andlit birst á síðunni auk þess sem upplýsingar um starfsfólk hafa verið uppfærðar.

Norður-Sigling fer nú tvær ferðir á dag í hina vinsælu ferð Hvali, lunda & segl sem farin er á Skonnortunni Hauk. Þessi ferð hefur verið afar vinsæl það sem af er sumri en í henni fá farþegar að fara í hvalaskoðun, upplifa lundamergðina í Lundey og sigla seglum þöndum á einu skonnortu Íslands.

Síðustu tvo daga hafa sést Steypireyðar í öllum Hvalaskoðunarferðum Norður-Siglingar, hnúfubakar sömuleiðis og hrefnur í einstaka túrum.

Laugardaginn síðastliðinn var Café Skuld formlega opnað með pompi og prakt. Af því tilefni mætti Sigurjón Jóhannesson sem sem er hafsjór af fróðleik um sögu Húsavíkur og þ.a.l. sögu Skuldarinnar og fræddi opnunargesti. Norður-Sigling og Heimabakarí (rekstraraðili kaffihússins) buðu svo upp á drykk í tilefni opnunarinnar og Sigurður Illugason spilaði svo og söng fyrir gesti og gangandi.