Fréttir Norðursiglingar

Í hvalaskoðunarferð á Bjössa Sör á Skjálfandaflóa í dag sást búrhvalavaða en búrhvalur hefur ekki sést áður í ferðum Norður-Siglingar þau 11 sumur sem fyrirtækið hefur boðið upp á hvalaskoðun frá Húsavík.

„Við höfum ekki séð búrhval áður hér í flóanum, aðeins blástur frá þeim í fjarlægð" sagði Þórunn Harðardóttir sem hefur verið leiðsögumaður hjá fyrirtækinu síðan 1997.

Eins og sagt var frá hér á vefnum í byrjun árs eignaðist Norður-Sigling tæplega 90 ára gamalt hús sem átti að rífa. Húsið var svo flutt inn að Rein í Reykjahverfi (suðurhluta Húsavíkurbæjar, verðandi Norðurþings) þar sem Stefán á Rein eins og hann er þekktur og hans menn fóru um það mjúkum höndum.

Eftir nokkurra daga hlé á hvalaskoðun vegna norðan brælu og ofankomu... já snjókomu... sigldi Bjössi Sör aftur út á flóann í gær.

Þrátt fyrir að töluverð kvika væri enn á flóanum, fann hin þaulreyndi Hrólfur Þórhallsson þrjá stóra hnúfubaka sem skemmtu hátt á þriðja tug farþega konunglega.

24. júní er lengsti dagur ársins, Jónsmessan, og í því tilefni hefur Norður-Sigling ákveðið að sigla til Grímseyjar og gefa fólki kost á að komast norður fyrir heimskautsbaug.

Fyrsta brottförin, fyrir þriggja daga ferð skonnortunnar Hauks, um eyjar og firði Norðursins er uppseld, en það eru enn laus pláss í ferðinni 7. júní.

Þessi ævintýraferð býður ferðafólki upp á einstakt tækifæri til að upplifa sérstæða náttúru og mannlíf við strendur Íslands. Þriggja daga (tveggja nátta) sigling og hvalaskoðun þar sem heimsóttar eru nokkrar helstu náttúruperlum fyrir Norðurlandi.

Í byrjun maí heimsótti Húsavík breskur blaðamaður að nafni Clive Tully, en hann var í ferð skipulagðri af ferðaskrifstofunni Discover the World í Bretlandi. Clive fór í hvalaskoðunarferð með Norður-Siglingu, heimsótti Hvalasafnið og naut fallegs umhverfis Mývatns.

Vel hefur gefið á sjóinn þar sem af er vertíð og allar áætlunarferðir verið farnar og nokkrar aukaferðir. Árangurinn hefur verið glæsilegur í öllum þeirra og lífríkið í miklum blóma, krían mætt ásamt lundum og fleiri fuglum. Veður hefur verið fallegt þrátt fyrir að kalt sé enn í lofti. Hnúfubakar og höfrungar hafa leikið aðalhlutverkin í ferðum Norður-Siglingar.

Enn ein frábær hvalaskoðunarferðin er að baki og óhætt er að segja að maímánuður hafi aldrei farið eins vel af stað og nú. Í ferðinni sáust alls 4 hnúfubakar, 6 höfrungar og nokkrar hnísur. Tveir af hnúfubökunum sýndu listir sínar svo um munaði við mikla hrifningu allra um borð, ekki síst áhafnarinnar.

Í dag var einkar fallegt veður á sjónum og líkt og undanfarna daga gekk ferðin vel. Alls sáust 3 hnúfubakar, 2 eða 3 hrefnur, nokkrar hnísur og 1 selur.

Það er óhætt að segja að hvalaskoðunarvertíðin á Skjálfandaflóa fari vel af stað því afar líflegt hefur verið í hvalaskoðunarferðum Norður-Siglingar fyrstu daga maímánaðar.