Fréttir Norðursiglingar

Fyrsta ferð sumarsins var farin í dag, 30. apríl og voru það 13 glaðlegir ferðamenn sem riðu á vaðið. Veðrið var eins og best verður á kosið, bjart og stillt og aðstæður allar hinar bestu.

Nú eru aðeins 2 dagar þangað til áætlunarferðir Norður-Siglingar hefjast. Fyrsta ferðin verður farin sunnudaginn 30. apríl kl 13:30 og verður ein ferð á dag út maí.

Það sem kemur e.t.v. fyrst upp í hugann þegar hugsað er um árið 2005 er hið risjótta tíðarfar s.l. sumar. Langvarandi norðlægar áttir gerðu starfsemi á sjó erfitt fyrir og alls raskaðist áætlun 28 daga og þar af var 21 dagur sem aflýsa þurfti öllum ferðum. Vegna slæms tíðarfars fækkaði farþegum lítillega frá árinu 2004 en reksturinn var á réttu róli og starfsemin gekk vel sem staðfest var með könnun meðal farþega Norður-Siglingar.

Hvalir sáust í um 94% ferða, sem er slakara en í meðalári en miðað við ytri aðstæður verður það að teljast nokkuð gott. Maímánuður skar sig úr enda var enn vetur á Skjálfandaflóa á þeim tíma. Aðrir mánuðir voru viðunandi og hér að neðan má sjá töflu sem sýnir hlutfall séðra hvala eftir mánuðum.

Nú á dögunum var Bjössi Sör, einn báta Norður-Siglingar tekinn upp í slipp á Húsavík. Er það sérstakt ánægjuefni fyrir Norður-Siglingarfólk því mikil óvissa hefur ríkt um framtíð slippsins síðan að fyrrverandi rekstraraðili hætti rekstri.