Fréttir Norðursiglingar

Eftir nokkra stormasama daga var loks hægt að fara á sjó aftur og í gær, og síðan þá hefur verið mikið líf á flóanum. Í ferðum Norður-Siglingar í dag hafa sést hnúfubakar, hrefnur og höfrungar og meira að segja sást glitta í hnísur í einni ferðinni ... sannkölluð hvalaveisla hér á Skjálfanda í lok ágúst.

Þó svo að Langreyðurin sem sást á föstudagsmorgunin hafi ekki staldrað lengi við hafa bátar Norður-Siglingar verið að sjá hnúfubaka í mörgum ferðum yfir helgina og nú síðast í morgun, en þá fundu tveir bátar Norður-Siglingar stærðar hnúfubak vestur í flóanum.

Nú rétt í þessu voru að berast þær fréttir af flóanum að reynsluboltarnir m/b Knörrinn og H/r Hrólfur Þórhallsson fundu feyknastóra Langreyði og sýndu gestum sínum. Reyndar mun það hafa verið hinn bráðefnilegi leiðsögumaður Hilmar Valur Gunnarsson sem sá hvalinn fyrstur manna.

Ferðin Hvalir lundar og segl hefur slegið rækilega í gegn og var umtalsverð aukning á þeim sem kusu þessa glæsilegu ferð fram yfir hefðbundu og ódýrari ferðina.

Hlutfall Íslendinga var ennfremur nokkuð hærra í þessari ferð og er það ánægjulegt.

Michael Tetley, breskur sjávarlíffræðingur sem sérhæfir sig í hrefnurannsóknum heimsótti Húsavík á dögunum. Rannsókn þessi er í samstarfi við Hvalasafnið á Húsavík, sem fær á hverju ári til sín erlenda sjálfboðaliða og sérfræðinga sem vinna við rannsóknir á hvölum og lífríki sjávar.

Í gærkvöld sást aftur til Steypireyðar á flóanum og skoðuðu hátt í 40 farþegar Norður-Siglingar dýrið í fallegu kvöldveðri.

Annars hefur flóinn verið líflegur og allt að 4 hrefnur sést í flóanum og höfrungar verið í stórum hópum en allt að 100 höfrungar hafa sést í hverri ferð.

Síðastliðna tvo daga hefur vart viðrað til Hvalaskoðunar og hafa bátarnir legið bundnir við bryggju. Tíminn er þó nýttur vel og nú í morgun fór reynsluboltinn Hrólfur Þórhallson yfir öryggismálin með vakthafandi áhöfnum.

Ferð sem nefnist "Hvalir, Lundar og Segl" hefur nú í sumar slegið rækilega í gegn. Nú er boðið upp á tvær siglingar á dag, þ.e. klukkan 09:30 og 17:00. Ferðin hefur eins og nafnið gefur til kynna 3 megin markmið, eða hvalaskoðun, lundaskoðun og svo eru dregin upp segl og siglt án vélarafls þegar byrlega blæs.