Fréttir Norðursiglingar

Nú í kvöld fann Náttfari, einn báta Norður-Siglingar tvær steypireyðar. Ljósmyndari var með í för og hér eru myndir glóðvolgar af flóanum.

Dagurinn í dag var sá annasamasti frá upphafi en 624 farþegar voru fluttir í 13 ferðum fjögurra báta félagsins út á Skjálfanda. Það má gera ráð fyrir að yfir 700 manns hafi því í heildina siglt í hvalaskoðun á Skjálfanda, en annað hvalaskoðunarfyrirtæki er nú einnig starfrækt á Húsavík. Í dag stóð því hvalaskoðunarhöfuðstaðurinn Húsavík vel undir nafni.

Annríkið skýrist reyndar að hluta til af því að veður hamlaði siglingum í gær, laugardag og því þónokkuð af fólki sem beið betri aðstæðna.

HH

Í gærkvöld sigldi skonnortan Haukur af stað til Siglufjarðar þar sem skipið verður til sýnis og siglir með þá sem vilja um Siglufjörðinn.

Veðrið á Húsavík hefur leikið við hvurn sinn fingur í dag og reyndar síðustu daga og virðist Íslendingum í hvalaskoðun fjölga ekki bara dag frá degi nú þegar líður að háannatíma heldur líka ár frá ári.

Miðnætursólin norður við heimskautsbaug er heillandi og hnúfubakar eru stórkostlegir... hvað með að steypa þessu saman í eitt? Þetta er niðurstaðan:

HH

Laugardagsins 17. júlí 2004 verður minnst fyrir stórkostlega hvalasýn hjá Norður-Siglingu en allt að sex tegundir hvala sáust í ferðum félagsins. Hrefnur, höfrungar, steypireyðar, hnúfubakar, hnísur og langreyðar voru þær tegundir sem sáust en e.t.v. komu 3 langreyðar hvað mest á óvart og vöktu mikla athygli

Langreyðar eru næst stærstu dýr jarðarinnar, eða á eftir steypireyðunum. Frekari upplýsingar er að finna hér á síðunni undir "hvalir skjálfanda"

Eftirfarandi myndir voru teknar af vélstjóra Náttfara í dag.

HH

Höfrungar spila oft stórt hlutverk í ferðum Norður-Siglingar og eru gleði og hamingjustunurnar ekki merkjanlega minni þegar hinir glaðlindu "dollarar" eins og þeir eru stundum nefndir af áhöfnum Norður-Siglingabátanna bregða á leik.

Stór hópur skáta var á dögunum í ferð um Ísland og var hvalaskoðun á Skjálfanda hluti af prógramminu.

Nú í dag var malbik lagt á planið framan Höfðavers, verkstæðis Norður-Siglingar úti á Höfða á Húsavík. Þetta mun verða til mikilla bóta og auðvelda lagerhald og bæta umgengni við verkstæðið.

Færri komust að en vildu í gærkvöldi þegar söngkonan Ragnheiður Gröndal og hljómsveit hennar, Black Coffee, héldu tónleika í Skipasmíðastöðinni á Gamla Bauk.

Meira efni um það væntanlegt...

Nú í morgun sáu farþegar 3ja báta Norður-Siglinga hóp u.þ.b. 10 háhyrninga. Í ferðinni sáust einnig hrefna, höfrungar, hnúfubakar og Steypireyðar.

Samkvæmt erlendum sérfræðingum mun þetta vera með því best sem gerist í 3ja tíma hvalaskoðunarferðum... ef ekki hreinlega heimsmet! (a.m.k. miðað við höfðatölu)

Nú síðdegis barst Norður-Siglingu hjálparbeiðni um að aðstoða rækjubát er fengið hafði trollið í skrúfuna austur af Flatey á Skjálfanda.

Dagurinn í gær var sá annasamasti í hvalnum í sumar en hátt í fimm hundruð farþegar sigldu með Norður-Siglingu í 9 ferðum þar sem steypireyðar og hnúfubakar léku aðalhlutverkin en hrefnur og höfrungar voru í aukahlutverkum.