Fréttir Norðursiglingar

Sendiherra Svía á Íslandi, Bertil Jobeus og kona hans Marie Louise voru í heimsókn á Húsavík í dag. Þau kynntu sér m.a. ferðaþjónustu á svæðinu, heimsóttu Safnahúsið og Hvalasafnið auk þess að borða hádegismat á Gamla Bauk í boði bæjarráðs.

Sumarið er komið í Skjálfanda og sést hefur til hvala. Enn hefur þó ekki verið siglt með ferðamenn út á flóann en bátar Norður-Siglingar eru nú að verða klárir einn af öðrum og því fátt að verða að vanbúnaði til að sigla út í ævintýraveröld Skjálfandaflóans.

Í litlum skúr á Borgarhóli, stað þeim er Garðar Svavarsson reisti fyrsta hús Íslandssögunnar um 870 er kjörviðarskáld Húsvíkinga við vinnu sína. Ólafur Guðmundsson hefur skorið ýmislegt út í rekavið fyrir Norður-Siglingu á undanförnum árum og ekki sér fyrir endann á því.